Escrito por Gran_Capitan_Blanco | 18 Enero 2010

O DUBRA B SÓ SUMA UN PUNTO DESPOIS DE DESAPROVEITAR GRANDES OCASIÓNS NO TEMPO ENGADIDO

SD DUBRA B: Juanjo, Donnici (Grille, min.45), Vázquez, Rubén, Casti, Víctor(c), Liñares, Chini (Julio, min.85), Yago, Dani (Julito, min.80) e Totti. Adestradores: Inglés e Sanchís.

PORTOMOURO CF: Diego, Simón (Bernabé, min. 60), Alberto, Gio, Rafa, Félix(c), Jorge (Andrés, min.55), Fernandiño (Sergio, min.78), Moli (Iván, min.87), Luís e Felipe (Mario, min.65). Adestradores: Martín e Josi.

Goles: 0-1. Luís (min.20), 0-2. Moli (min.30), 1-2. Totti (min.31), 2-2. Liñares, de falta (min.89)

Árbitro: Gonzalo Goyanes (Santiago). Expulsou con dobre amarela ó visitante Alberto no minuto 89.

Campo: A Tilleira, sobre 200 afeccionados.

Incidencias: partido correspondente á xornada 21 do grupo 5 da 2ª Autonómica entre dous equipos do Concello de Val do Dubra.

Bonito partido o que se puido presenciar este domingo na Tilleira. Un punto para cada equipo nun encontro no que houbo emoción ata o final. O Dubra B conseguiu neutralizar un 0 a 2 e despois acabou lamentando a falta de acerto diante da meta de Diego.

Comezou mellor o equipo da casa. Varias xogadas de ataque finalizadas por Totti serviron para poñer a proba a Diego. A resposta do Portomouro chegou no minuto 20. Un saque de banda de Rafa era prolongado por Alberto no primeiro pao e Luís, no segundo, facía o 0 a 1. Pouco despois, idéntica xogada e idéntico resultado. De novo un saque de banda de Rafa era finalizado esta vez por Moli. Lonxe de virse abaixo, os xogadores amarelos non tardaron en reaccionar. Foi sacar de centro e conseguir o empate. Un golpeo en longo de Donnici deixou só a Totti contra Diego, que conseguiu superalo na saída e marcou a porta vacía. Chegábase ó descanso co marcador de 1 a 2.

Dou comezo o segundo tempo e o Dubra B saíu decidido na busca do empate. Diego evitouno en varias ocasións. Vázquez viu como se lle anulaba un gol por un discutido fóra de xogo. Non foi ata o minuto 89 cando se establecería a igualada. Alberto comete falta ó borde da área e o árbitro móstralle a segunda amarela. Liñares encárgase do lanzamento e consegue o empate colocando o balón por riba da barreira. Nos minutos de desconto o Dubra B dispuxo de ocasións inmellorables para poder conseguir a victoria. Primeiro, unha dobre oportunidade. Un remate de cabeza de Totti foi despexado na liña de gol por Félix e, seguidamente, Grille cabeceou demasiado alto con Diego xa batido. A última xogada do partido tivo como protagonistas a Julio e a Julito. O primeiro puxo o centro e o segundo, a porta vacía, rematou de cabeza demasiado alto.

Finalmente reparto de puntos que fai que o Dubra B baixe un posto e que o Portomouro manteña a quinta praza.